الساعة حاليا 1:10 صباحا
معنديش رغبة بالنوم يومي مر ببطئ كبير فكرت بكثير اشياء حابه اشاركها على الرغم من التشتت الي غرقانة فيه.
الساعة حاليا 1:13 صباحا
اشتقت لحدا احكي معو احكيلو عن تفاصيل يومي اعبرلو عن مشاعري لما بكون مبسوطة لما بكون زعلانة لما بعصب او لما بجن وبصير زي الهبله اضحك واعمل شغلات مش طبيعية حدا بعرفش ان كان حبيب او صديق او مجرد غريب اتخربط وقالي مرحبا.
الساعة حاليا 1:17 صباحا
بهالوقت حابه اعترف باعترافات كثير بعرف انو مدونتي ما بفوت عليها كثير ناس بس عندي اسرار بدي اشاركها لحدا بعرفوش او بعرفنيش مش مهم المهم حدا يقراني.
الساعة حاليا 1:18
اول سر: بعرف انو ما في حدا بالكون ممكن يوقف جنب حدا او يدعم حدا او يساعد حدا مثلك بعرف كمان انو ما في حدا ممكن يتغيير ويروح ويختفي من وحياة حدا ببساطة مثلك بعرف كمان انو اليوم انا اشتقتلك كثير لدرجة انو بمسك التلفون لاتصل فيك بس بلاقي تلفونك مسكر بيجي عبالي ابعثلك رسالي بس ما بتوصل بفتح الفيسبوك بدوير ع اسمك من بين اصحابي مش موجود برد بعمل ع اسمك ع البحث كمان مش موجود اه نسيت ما انتي مش بس اختفيت من حياتي انتي عملت عليي بلوك من حياتك
مؤسف كثير كان جاي عبالي انقلك اخباري المش حلوه بدونك
ثاني سر: حبيتك من كل قلبي براهنك ما حدا حبك مثلي حتى امك وخواتك ما حبوك مثلي براهنك ع حياتي انو حتى المره الي حتتجوزها والبنت الي حتجيبها منها مش رح يحبوك مثلي انا مش ح ابكي وانا بكتب لا انا فخورة كثير بحالي اني حبيتك وعطيتك كل المشاعر والاهتمام من قلب وبالمقابل انت جرحتني وحاولت تكسرني ومع هيك ضليتني احبك وتناسيت الاهانات والوجع الي زرعتو فيي..
بتعرف بس اتذكر بشهق هذيكي الشهقة الي قبل الموت بثواني و عالرغم من كلشي سامحتك وضليت حبك وانت شو عملت مسكت تلفونك فتت ع الواتس اب دورت ع اسمي وحكيتلي مش ممكن نكون لبعض واعتذرت وعملت فيها جنتل مان وانو خايف والله يسامحني وحملت حالك وطلعت سكرت تلفونك ونمت.
بتعرف يا سيد انا بهذيكي اللحظة وعدت حالي ما ابكي واتجرأت وسألتك عن السبب ردك كان انو حضرتك ما بتتنازل عن مبادئك
ما ناقشتك تمنيتلك الخير حطيت التلفون ع جنب وفتت ع الحمام فتحت الدش وبلشت ابكي يمكن شي يوم يومين او اكثر وانا بهالحالة وبعقلي بدور سؤال واحد: معقول الافلام الهندية من واقعنا مش خيال؟؟.
ثالث سر: انا ما حبيتك ولا فكرت انو بيوم احب حدا نفس شخصيتك كل القصة انو كنت شايفة حالى غلط وبما انك كنت غلط فقلت يمكن سالب وسالب يكونو موجب بالاخير ونسيت انو انا مش علامة بين رقمين مشيت معك لحد ما اجيت ودقيت الباب ويا ريتك ما دقيتو لانو وقتها ايدك انكسرت وراسي انخلع ورجعت ع بيتك وفش يا عمي نصيب احنا خلصنا بس القصة كبرت وصارت صبية تلف بين هاذ وهذاك وتحكيلهم حالها وعشان يزيدو معجبيها كانت تبهر وتملح وبالاخير انت خطبت وانا ضليت علقانة بهالقصة الي مليش حتى دور فيها والسؤال الي براسي بلف : معقول حدا بصدق انو الذيب عنجد بحكي وانو ليلى الحمراء حقيقية؟؟
رابع سر: يا اسراري الثلاث بعرف اني خسرتكم كلكم رح يتهيألكم انو كذبة جرت كذبة جرت كذبات بس الحقيقة يا سري الثاني انو قد ما انا كنت صادقة وبريئة ما حدا صدقني والسؤال الي براودني الساعة 1:48 صباحا: هل فعلا الصدق بزمن الكذابين لا يعد صدق ؟ ع كل بتمنى يجي يوم وتقرو حالكم هون وتعرفو الي ما قدرت احكيلكم اياه مش لاني ما قدرت بس لاني فضلت اسكت بزمن مش الي.
